МяхIяммадрасулла гьунар

МяхIяммадрасулла гьунар

ХIясанов МяхIяммадрасуллизиб спортличи диги виштIахIелил дакIубиубсири. Цартилтира башули чебиухIели, илдачи мешувикес ва гьатIира цIакьвиэс ибси кьасличил МяхIяммадрасул Лавашабси спортла школализибси мушулвашнила секциялизи вашесвяхIиб. Уршини илар вирхIнила шайчирти дигIяндешуни гIяхIил дяркъур ва гIяхIил бажардииркан мушлукья ветаур.

Дусми ардякьи гIергъира мушулвашниличи илизибси гъира бетхIехъибну, гьатIира цIакьбикIесбяхIиб. ЦIакьтала ургар дурадуркIути декIар-декIарти абзаначи вашули чедиирканвиуб.

ГIергъиси замана илизиб профессионалти бирхIуси абзлизир бутIакьяндеш дарес хьул акIуб. «Беркут» бикIуси шабагъат багьанданти абзаназир бутIакьяндеш дирути 16 спортсментала лугIилизи илра керхур. Абзаназиб цацабехIти чедибиркули, цархIилти уббиркули бегIлара гIергъи кIел адам калун. Илди сабри ХIясанов МяхIяммадрасул ва Омск шагьарлизивадси Александр Подмарев.

Илди кIелра бирхIуси бархIи кабизахъур. Ил абзличи нушала жагьилталара халаси тамашадеш лебри. Илбагьандан Грозныйлизи дахъал машинтачиб МяхIяммадрасул уркIичевварес адамти арбякьун. Или биубхIели, МяхIяммадрасуллизиб чедиикес ибси кьас гьатIира цIакьбиуб. Подмарев цIакьси спортсмен виалра, ХIясанов иличив чедиикес бажардиикиб ва чемпиондешла ири сархиб. Чедиикнилис лайикьбарибси арцла шабагъатра илис бикиб.

Чедиикили гIергъи ХIясановлизи гъай бедибхIели, илини сай спортличи бурсиварибтас, хаслира ГIябдусаламов ХIусейс ва сай гIеввуцес багьандан Грозныйлизи бякьунти адамтас баркалла багьахъур.

Нушани МяхIяммадрасул ил чедибдешличил мубараквирулра ва гьатIира халаси шабагъат лугути абзаначив бегIлара ахъси ганзиличи айцIули дигулра.