ГIяхIдешлуми диэсгу или хьулдикIехIе

ГIяхIдешлуми диэсгу или хьулдикIехIе

Гьалавван Дагъиста шила хозяйствола ва берк бержла министр Абзагьир ХIусейнов Лавашала районнизи вакIиб ва ишабти шила хозяйствола хIянчизартачил гьуниваиб. «Лавашала район» МР-ла актовый заллизиб дураберкIибси гьунибаъниличиб лебри: «Лавашала район» МР-ла БекI Шамиль Дабишев, Дагъиста Халкьла Собраниела депутат, ил Собраниела аграрная политикала ва тIабигIят пайдалабирнила шайчибси Комитетла член Мухтар ХалалмяхIяммадов, ДР-ла Минсельхозпродла жинсла мицIираг адилкьнила шайчиб бузуси отделла начальник Юсуп ХIясанов, Лавашала районна шила хозяйствола отделла начальник АсхIябгIяли ХIядисов, шимала бурги, депутатуни ва шила хозяйстволизиб бузути адамти.

Совещаниеличир пикридарибти масъултала ургаб лебри районна шила хозяйстволизиб бузути адамтас пачалихъласи кумек гIеббуцнила хIекьлизибси масъалара.

Цалабикибтала гьалав гъайулхъули министрли цабутIаван буриб: «ХIурматла шила хозяйствола хIянчизарти, юлдашуни, наб дигулра иша цалабикибти лебтасалра, илкьяйдали районна лебилра адамтас, хIушала къияйчил хIушала хъалибаргуницунра ахIи, дунъяла бахъал адамтира балхнилис баркалла багьахъес. Ну бузерила хъалибарглизив акIубсира, кабинетлизив кайили ууси адам ахIенра, шила хозяйствола хIянчизарла къиян сегъуна сабил балас. ИшбархIи нуша иша цаладикнила мурад саби шила хозяйствола хIянчизартас секьяйда кумек барес вирарал масъала пикрибарни. ХIушала районна адамти бузери дигути саби. Нуни балас ишдуслизиб Лавашала районни овощунала бегIлара халаси сабухъ бакIахъни. Амма, ил берхахънила шайчиб, ириъличил мешубуцибхIели, къияндешуни лер.

Даширая, капусталичила, ил гIяхIил берхахъес секьяйда вирарал гъайдикIехIе. Ишдуслизир илди хайриличил дицес къиянни саби. Капуста дашахъуси гьарилли пикрибиру илди дахъал ва гIяхIти дакIахъес. Се пайда.

Нуни хIуша жидирулрая кооперативтази цаладикахъес. Кооперативтала тяхIяр лебси саби, ила цалабикибтала чула вегIдешличи ихтияр кебисниличила пикри бекIлил биэс асухIебирар. ХIушала ванза, ил бузахъути гIягIниахъала чилилра архути ахIен. Ишаб бурибсигъуна тяхIяр бузесиуси саби хIушани бакIахъибси продукция бицес багьандан халати исантачил гъамдиахъес, ил лугIилизиб оборонала Министерстволичилра. Гьанна капуста мяхIкамдирнила сагаси тяхIяр пикрибарили саби. Ил саби капуста дурахъни. Дерахъубти капуста северла мер-мусаличи даахъалли, илар илди шин чертIили кIантIидарили, сагати капуставан калзахъу. Ил сагаси технология саби. Кооперативти акIахъалли, пачалихъли холодильный гIягIниахъала, техника, гье ва цархIилти гIягIниахъала асахъес белгиси кьадарла арц луга, нушаб дебали мягIничебси саби продукция башахънила хIянчи ца тяхIярли ва гIяхIил биахъни. Кооперативтази цаладикадалли, нушани балехIе хIушала халаси продукция лебни, илхIели ил исутачил тянишдиахъубли, берхахънила шайчиб кумекра бетарар.

Лавашала районнизиб маза-мас ва хIяйванти адилкьнила аги гIяхIил саби. МицIирагла лугIи хIясибли хIушала район Дагъистайзиб Ногъайла районнис гIелаб кIиэсил мерличиб саби. Ишаб бурес дигулра хIушачиб жинсла мицIираг адилкьуси цалра хозяйство агниличила. ХIебиалли, диълизибад ва балализибад кайсуси хайри биэсличиб камли саби. Селичибли гIяхIсив жинсла мицIираг адилкьни? Ил хIянчилис пачалихъли харжани имцIали лугули сари. ГIурра, хIушани бархьси тяхIярли жинсла мицIираг адилкьнила хIянчи бузесаадалли, имцIали кайсидая бала, диъ ва пачалихълизибад субсидия. Дебали дигахъаси хIушани ил хIянчи бузесаадалри.

Нуни балули кьяйда, арбякьунси дуслизиб диъ бирцнила шайчиб къияндеш аги, багьара гIяхIсири. Ишдуслизиб биалли, гьалаблагъуна багьа агара. Дебали мягIничебсили чебиулра овощуни дашахъути кьяйдали мицIираг адилкьантира кооперативтази цалабикни. Районнизиб лерил гIягIниахъайчил гIеббуцибси кьасапхана (бойня) барес гIягIнибиркур. Кооперативтази цалабикили гIергъи илис харждирути арцла 60 процент пачалихъли луга. ГIурра наб бурес дигуси секIал саби хIушани мицIираг «Меркурий» фирмализирад исни. Рахли изала дакIубиалли нушани багьес дирехIе мицIираг чинад асибсил. Белгили ахIенси мерличибад асибси хIяйван излуми тIинтIдируси биэсра асубирар. Или биубхIели, гIягIнили саби ветеринартачил бархбас биахъни, тухтур-ветеринарли хIяйван чинад ва чила асибсил балалли гьамаддеш бирар. ХIяйванти иснила шайчиб сукъур-вачар мабиридая.

ХIуша кооперативтази цаладикадалли нушани жинсла мицIираг асахъес кумек бирехIе, субсидиябачилра гIердурцурая. Жинсла мицIираг исадалли имцIали хайри кайсесра дирудая».

Министрлис гIергъи «Лавашала район» МР-ла БекI Шамиль Дабишевра гъайухъун. Ил викIи:

- Нушала районнизиб ишбархIилис лебси шила хозяйствола аги мурхьли пикрибарнилис ва насихIятунас дила ва иша цалабикибтала шайзибад Абзагьир ХIусейновлис баркалла багьахъес дигулра. Илини дурибти кумеклати тяхIяр-кьяйда нушаб дебали багалатили урдулхъан. Илини гIердурибти хIедарахIелли, лерси тяхIярли кавлехIе. Нушаб гIяхIдешлумачи гьуни саби сагати тяхIяр-кьяйдаличи бурсидиъни. ГIурра тикрарбирулра, бузерила адамлизибад селра кебасес ибси ахIен мурад, мурад саби гьариллис гIяхIдешлис кооперативтази цаладикни. ЦархIилти пачалихъуназирра кооперативти акIахънилизибад кайсуси гIяхIдеш дахъал дусмала бухIнаб чебиухIели, илгъуна тяхIяр бузахъехIелли, нушабра гьамаддешуни ва гIяхIдешуни дирар ибси хьул биэс гIягIнибиркур».

Гьунибаънила ахирлизир министрли суалтас жавабтира дедиб. Илини гIурра тикрарбариб Дагъиста шила хозяйствола ва берк-бержла министерстволи Лавашала районна шила хозяйствола хIянчизарти чус гIягIниси кумекличил гIеббуцили бирар или.

ГIяхIмад Лабазанов