Мурталра ахъли айцIен, МяхIяммад!

Мурталра ахъли айцIен, МяхIяммад!

Лавашавадси Жарбаев МяхIяммад вирхIнила джиу-джитс журализив дунъяла чемпион ветаъниличила хабар гьар чиналра тIинтIбиуб. Лавашалантас биалли ил имцIали разибиэси хабар сабри.

МяхIяммад чемпион ветаъниличила белкIес набра разидеш саби. СенкIун, ил нуни виштIахIейчивадал валуси сай. Спорт дигухIели, гьар бархIи сунес мугьлатдеш агарли хIядурикIухIели, МяхIяммадлис чемпион ветаэс имкан бакIибси саби.

Жарбаев акIубси сай 1993-ибил дусла февральла 14-личив Лавашала шилизив. 7 дусла гIямруличив ил спортла школализи вакIиб ва сунечи умутбихьеси дурхIя сайлин чеахъиб. Азадли мушулбашнила шайчирти декIар-декIарти абзаначи чуйнара вякьун ва сунезирти гIяхIти устадеш багьандан бахъла пикри сунечи битIикIусири.

Лавашала кIиибил номерла школа таманбарили гIергъи МяхIяммад ДГУ-ла экономический факультетлизив учIес керхур. УчIуси мерличибра гIяхIти спортсменти дебали дигахъу. МяхIяммадличира ишаб диги цIакьбиуб, сенахIенну ил азадли мушулбашнила шайчив ва грепплинглизив Россияла спортла мастер сай. Ил джиу-джитс бикIуси журализив дунъяла чемпион, грепплинглизив Европала чемпион сай.

- Дила азадли мушулвашнила шайчив цаэсил тренер сайри МяхIяммад МяхIяммадгIялиев, — викIули сай МяхIяммад, — гIур тренерти бетаур МяхIяммадзагьир ва МяхIяммадсалам ГIябдусаламовхъали. — Спортличи диги адикьнилис ну илдас дебали баркалла викIулра. Илдани набзи гIяхIил аргъахъиб спортлизиб цIакьцун баибси хIебиъни, техника гIягIниси биъни, вегIла къайгъира гIягIнибиркур. БекIлибиубси биалли, чедииркес багьандан тренировкабачир дахъал майа дурайули хIядурикIес гIягIниси саби.

ЦархIилти спортсментала кьяйдали илалара кьяш, някъ яра цархIил секIал изиаурти анцIбукьуни дири, амма багьлахIейрули абзаначи хIядурикIусири ва гьалавяхI вашес къайгъи убяхIхIебиркахъи.

ВиштIахIелил азадли мушулвашнила шайчив Лавашала районна чемпион ветаур, зона хIясибти абзаначив авна чедиикиб, Дагъиста чемпионатличив гьалабси мер буциб, Избербашлизир детаурти абзаначиб спортла мастерла у сархиб. Илис Россияла чемпионатличирра бутIакьяндеш дарес имкан бакIиб. Дебали цIакьти мушлукьябачил вирхIяс къиянни биалра, илар бутIакьяндеш дарни МяхIяммадлис гIяхIси дарсли бетаур.

Грепплинг журализив МяхIяммад хIядурикIули кIел дус виубхIелил Ставропольлизир детерхурти Кавказла кубок багьанданти абзаначив спортла мастерла у сархиб. Илцунра ахIи, Дагъиста ва СКФО-ла чемпион ветаур, Россияла чемпионатличиб кIиибил мер буциб. Тамашала анцIбукь сабри Бухарестлизиб бетаурси Европала чемпионатличив сай Россияла абзаначив удиикибси спортсменничив чедиикили, мургьила медальличи лайикьикни.

Москвализиб бетерхурси джиу-джитсла шайчибси дунъяла чемпионатличиб 75 килограммла битIакIлизиб 22 цIакьти спортсмен лебри. Гьаланачи ил очкоби хIясибли бразилияланничив, чеченничив, украиналанничив чедиикиб. Финаллизив дебали цIакьси казахличив чедиикили чемпион ветаур. Ил чедибдеш МяхIяммадли сунела дигуси халанеш ГIяйшатлис багъишлабирули сай.

- Гьарил спортсменна сунес дигуси, илизибад гIибрат касеси чемпионти бирар, хIед илгъуна чи лева? — хьарбиулра МяхIяммадлизи.

- Азадли мушулбашнила шайчиб наб дебали гIяхIбилзан Бувайсар Сайтиев ва Мавлет Батыров. Джиу-джитс журализиб биалли, имцIали дигести саби Бразилияла спортсменти. Ил жура Бразилиялизиб акIубсира саби.

- Наб дила бегIти дебали дигахъис, халаси баркалла наб бяркъ гибси халанеш ГIяйшатлис. Амма, дирхаирая, МяхIяммад айзи дуцIикIен, спортзаллизи укьян или, гьачамалра чилилра набзи ибси ахIен. Ил шайчиб нуни халаси къайгъи бирусири. Гьай-гьайра, гIяхIти тренертала халаси гIяхIдеш биуб, хаслира спортла школала директор ХIусен Ибрагьимович ГIябдусаламовла, — викIули сай МяхIяммад ва чебалтули сай:

«Дила биштIати кIел узи леб. Илдасра спорт дигахъу. Сунечи дебали умутбихьеси сай 12 дус виубси виштIал узи, ил набчивра чедиулхъан или гьанбиркули саби».

МяхIяммад дунъяла чемпион ветаъни илала бегIтас, тренертас, юлдашунас разиси анцIбукьли бетаур. Илгъуна разидеш цархIилти дурхIнанира сархес бирути саби эгер спорт дигахъалли, гIямрулизиб арадеш имцIабирахъути аги-кьяйда дузахъалли, вегIличил бархтачилцунра ахIи, цархIилти биштIа-халатачилра хIурмат-хатирличил биралли.

МяхIяммадла сархибдешличи лебилра разибиуб ва дунъяла халати абзаначир гьаннала гIергъира чедибдешуни сархули, вегIлара ахъихIи айцIниличи бирхауди бихьес дигули саби.

ГIяхIмад Лабазанов