Наркотикал рикьад те - лъималазе тарбия кье...

Наркотикал рикьад те — лъималазе тарбия кье...

Эбел-инсуда гIадин лъимадул гIамал-хасият лъидаго лъаларо. ТIоцебесеб иргаялда, гьезда бихьула ва бихьизе ккола жидер лъимадул гIамалалъулъ раккарал батIи-батIиял хиса-басиял, рукIа-рахъин ва гьабулеб-толеб.

Эбел-инсуда бараб букIуна лъималазул гIадлу-низамги. Гьединлъидал, тIоцебесеб иргаялда, лъимал квешлъабаздаса цIунизе ккола эбел-инсуца. Жакъа гIун бачIунеб гIелалъе бищунго хIинкъи бугеблъун ккола наркотикал. Амма кинха лъазе бегьулеб васас яги ясалъ наркотикал хIалтIизаризе байбихьун букIин?

Мисалалъе, гьоркьо-гьоркьоб, лъимералда бихьулареб къагIидаялъ (бихьани гьезда гьеб квеш букIинеги бегьула, хасго балугълъиялде рахаразда) халгьабизе ккола лъималазул къайи-цIаялъухъ, ретIел-куналъухъ. Наркотикал хIалтIизарулезул ретIел-куналда гьоркьор ратизе бегьула шприцал, рукIкIби, тIеренал мащаби. Хасго кIвар кьезе ккола лъимадул къайи-цIаялда гьоркьор дараби, таблеткаби, хъурараб дару яги цогидаб бугищали. Хъалиян бухIулеб батани, халгьабизе ккола кинаб хъалиян гьез бухIулеб бугебали. «Беломор» гIадал папиросал хIалтIизарула анаша бухIулез. Наркотикал хIалтIизарулезги рахчула гьезда жанир наркотикалъул цIезарурал тIеренал мащаби.

Наркотикал хIалтIизаруле-зул ясберал рукIуна цIакъго гIатIилъун, кIодолъун, яги цIакъго гьитIинлъун. Гьез бицунеб хабар букIуна рагIа-ракьанде щвечIеб, магIна гьечIеб. ГIаракъидул махI гьечIониги, гьезул рилълъин ва рагъа-ракари букIуна мехтарал чагIазулго гIадаб. Балъго наркотикал хIалтIизаризе лъугьараб лъимер дагь-дагьккун ругьунлъула гьерсал рицине, цIогьодизе. Гьединал лъималазул сунде букIаниги интерес тIагIуна, цебеккун гьабулеб букIарабщинаб гьезда чIалгIуна, гьезул киналдасаго ракIбуссуна.

Лъимал телефоналдасан кIалъалелъул балъго гьез бицунелъухъ гIенеккизе ккола. Телефоналдасан цоцазда кIалъалелъулги наркотикал хIалтIизарулезул букIуна жидерго хасаб, балъгояб, рагIул магIна хисизабураб мацI, ай жаргон. Мисалалъе, гIурус мацIалда гьез хIалтIизарула «баян», «пыхнуть», «план» абулел рагIаби. Гьебго заманалда эбел-инсуца лъимералда жидерго божилъи гьечIолъи бихьизабизеги бегьуларо. ХIаракат бахъизе ккола гьезулгун гIаммаб мацI батизе, гьеб квешаб жо букIин, гьелъ лъикIалде рачунареблъи берцинго бицун бичIчIизабизе.

Эбел-инсуда киданиги кIочене бегьуларо лъималазул букIинесеб гьезда бараб букIин.