Кутиша росулъе сапар

Кутиша росулъе сапар

Апрелалъул 17абилеб къоялъ Лаваша районалъул нухмалъулез иргадулаб сапар бухьана Кутиша росулъе. «Лаваша район» муниципалияб районалъул бетIер Шамиль Дабишевасда цадахъ гIахьаллъана Халкъияб Собраниялъул депутат Мухтар ХаламухIамадов, районалъул депутатазул Собраниялъул нухмалъулев Юсуп ГIалибеков, УСЗНалъул нухмалъулей ГIабидат МухIамадова ва гьединго районалъул цогидал идарабазул нухмалъулел. Данделъи рагьана Кутиша росдал бетIер Шамиль Шахбановас. Кутиша росдал жамагIаталъул аслияллъун рукIана суалал: спортзал цIигьабун къачIай, росулъ жанир нухал къачIай, культураялъул рукъ бай, росулъ бугеб памятник цIигьабун къачIай, лъималазул ахалъул зданиялъе копиталияб ремонт къваригIи, гьединго кIвар бугеб суал букIана — росулъ лъим гьечIолъи. Гьел киналго суалазухъ мухIканго гIинги тIамун Шамиль Дабишевас росулъ нухал къачIаялъе 500000 гъурущ бихьизабизе рагIи кьуна, лъималазул ахалъе ремонталъе къваригIараб щиб бихьизабизе кколаяли хадусеб анкьалъ вачIуне вугин абуна, памятник цIигьабиялъе проектно-смектияб документ хIадурулеб бугин бицана, росулъ лъим букIиналъе буровой скважина бухъизе кумек гьабилин абуна. Гьел гурел цогидал суалалги районалъул нухмалъиялъ хIисабалде росана ва кIвараб хIаракат бахъизе ва кумек гьабизе буго гьел тIуразаризе.