Жея, ясал

Жея, ясал

Руччабазул байрам кIодо гьабуна

ХахитIа,ТIарада-ЧIугIли ва Гъоркьа-ЧIугIли школазул ясазул командабиги гIахьаллъун Халкъазда гьоркьосеб руччабазул къоялде ХахитIа росулъ тIобитIана «Жея, ясал» абураб къец.

Къецал тIоритIиялъул аслияб мурадлъунги букIана мугIрузул росабазул руччабазда, ясазда гьоркьоб гьудуллъиялъулал бухьенал щула гьари ва магIарул халкъалъул миллияб маданият халкъалъе рагьи.

Къецалъул программаялда рукIана: стол берцинго къачIай, капустадул салат гьаби, лъимер бущи, сурат бахъи, кIечI пасихIго цIали, хинкIал руцIцIи ва гьединго цогидал конкурсал.

РетIараб ратIлидаса бахъараб щибаб номер мухIканго хIадурун бугоан лъабабго командаялъ.

Ясаз бихьизабуна кинай йикIине кколей унго-унгояй магIарул хъизамалда йигей чIужугIаданали. Конкурсалда ракI хIайран гьабуна, ТIарада-ЧIугли командаялъул ясалъ кинида лъимерги бущун, ахIараб, нилъеда кIочон тараб, кинидахъ кIочIоца. Гъоркьа-ЧIугIли командаялъ цIакъго берцин хIадурун бугоан миллияб ратIлил некIсияб бакънада гъоркь церерахъиналъул конкурс. Стол берцинго къачIай ва гьобол къабул гьави, ХахитIа командаялъул ясаз, тIобитIана цIакъ гIадатияб магIарулазда рекъараб къагIида.

Конкурсалъул хIасил кинаб кканиги, гьениб 1-2 баллалъул батIалъи ккана командабазда гьоркьоб, абизе бокьун буго, тадбиралъул аслияб мурад тIубанилан, бергьана гьудуллъи.

Къецазда гьеркьоб ккезабун, ХахитIа росдал КДЦялъ тадбиралде ракIарарал руччабазе сайгъат гьабун, кьуна концертги. Гьезул ракIал асир гьарурал кIучIдуз кьуна байрамалъе цо хасаб берцинлъи. Руччабазул байрамалда данде ккараб гьезул кучIдузул репертуаралдаса разиго хутIана росуцоял ва гьалбал.