Пачалихъла бекIлибиубси закон

Декабрьла 12 — Россияла Конституцияла БархIи

Пачалихъла бекIлибиубси закон

1993 ибил дусла декабрьла 12-личиб лебил халкьла тIамри хIясибли Россияла Федерацияла Конституция кьабулбарибсири. 1994 ибил дусла сентябрьла 19-личиб ил бархIи пачалихъласи байрам саблин багьахъур.

Гьанна бузули лебси Конституция хIядурбиъни ва кьабулбарни бетерхурсири хIукуматла кIелра кьяли президент Борис Ельцин ца шайчибад ва законти дурайуси хIукумат — РФ-ла Верховный Совет итил шайчибад цаличи-ца къаршиси анцIбукьлизиб. Конституция чумал секIлазибад цалабяхъибсири. Илдазибад бекIлибиубси сабри РФ-ла Верховный Советла Конституцияласи комиссияла проект ва Ельцинна хIукму хIясибли, Конституцияласи совещание дураберкIили хIядурбарибси проект. Конституцияласи совещаниела проектли Конституцияласи комиссияла проектла имцIатигъунти положениебира сунези касиб ва федерацияла субъектунала, депутатунала, специалистунала, ялчи группабала бутIакьяндешличил чехIербарили, хьулчилизи касибсири. Ил проект сабри президентли лебил халкьлизи пикрибарахъес гьалабихьибсира.

Сагаси Конституция кьабулбирнила Референдум 1993 ибил дусла декабрьла 12-личиб бетерхур. Илизир бутIакьяндеш дариб Россияла 58 миллион 187 азир 755 адамли, яра белкIунти избирательтала 54,8 процентли. Конституция кьабулбарес или тIамри дедиб 32 миллион 937 азир 630 избирательли (58,4 процент). Конституция хасси тяхIярли цIакьлизи кеберхурсири ил кьабулбарибси бархIи 1993 ибил дусла декабрьла 25-личиб.

РФ-ла сагаси Конституцияли пачалихъласи хIукуматла чаряхIти органтала кабиз гIяхIцадла барсбиахъуб. Илизиб ихтиюрти декIардарнила тяхIяр дебабарибсири, Россияла федеративный кабиз сагабиахънила гьунчиб мягIничебси ганз кацIиб. Нушала улкала историялизиб бегI-гьалаб конституциялати тяхIяр-кьяйда дархьаначи дузахъес цIакь бедибсири. Илизибад аргъес чебиркур, гьарил адамли, конституциялати тяхIяр-кьяйдаличи хъаряхъили, сунела ихтиюрти датахъес вирни, судла ва пачалихъла цархIилти органтани, делоби ахтардидирухIели ва жаллати масъулти ирзухIели, бегIлара гьалаб бекIлибиубси законна тяхIяр-кьяйда пикрилизи кайсес гIягIниси саби. Сагаси Конституцияли, гьалабла тяхIярли, пачалихъласи лебдешла хьулчиличибси экономикаласи системаличил дарх гIердурцули сари вегIдешлати лерил тяхIурти, гражданское общество гьалабяхI арбукнилис азадти тяхIяр-кьяйдара гIердурцули.

БекIлибиубси законни РФ-ла президент пачалихъла бекI сайлин чейахъули сай ва иличи хъардарили сари Конституция, адамла ва гражданинна ихтиюрти ва азаддеш далтахънила, Россияла Федерацияла суверенитет, илала хъархIерагардеш ва пачалихъласи цабайдеш калахънила, пачалихъла хIукуматла органтала царугси ва балкабикибси бузери гIеббуцни.

Россияла Федерацияла президент сунела къуллукъличи кайрухIели, Россияла Федерацияла Конституцияла жузличиб халкьлис мардешличил къуллукъбарес хъя бируси сай. Ил хъя Конституцияла 82-ибил статьяли дебабарибси саби.

Россияла Федерацияла президентла 1996 ибил дусла августла 5-личибадси Указ хIясибли кабизахъурсири Россияла Конституцияла хасси текстла хIядурбарибси цайли-цаси экземпляр президентдешла хIукуматла хасси гIяламат саби или. Амма, 2000-ибил дусла майла 7-личиб, итхIели РФ-ла президентла къуллукъуни дузахъуси Владимир Путинни 1996 ибил дусла Указ уббяхъиб. Итала гIергъи Конституцияла хасси экземпляр президентдешла хIукуматла хасси гIяламат ахIен или кабизахъур.

2000 ибил дусличибад бехIбихьили, Россияла президентлизиб ихтияр леб бекIлибиубси законна чидил-дигара жузличи някъ кабихьили хъя барес.

1996 ибил дусличибад 2008 ибил дусличи бикайчи Конституциялизи, Федерацияла субъектуни халадаахъниличил, илкьяйдали илдала уми дарсдарниличил дархдасахъи цацадехI дарсдешлуми кайкахъиб. 2009 ибил дусла декабрьла 30-йчир бекIлибиубси закойзи мягIничерти белкIани кайкахъиб. Илди хIясибли РФ-ла президентла ва Россияла парламентла удибси палатала депутатунала ихтиюртала замунти кайзахъур: пачалихъла бекI виркIуси сай 6 дуслис (гьалав — 4 дуслис), Госдумала депутатуни биалли — 5 дуслис (гьалаб — 4 дуслис). Илала дурабад правительстволичи чеббарили саби сунени барибси хIянчила хIекьлизиб Госдумала гьалаб гъайбулхъахъес.

2014 ибил дуслизир, РФ-ла Верховный суд ва ЧебяхIси арбитражный суд цаладяхъниличил, РФ-лизи Республика Крым ва федеральный кьадрила шагьар Севастополь дархдяхъниличил, илкьяйдали «федеральный сенатортала» институт бузесаъниличил дархдасахъи дарсдешлуми кадерхахъур.

12 дус Конституцияла Бар-хIи адамти бузути ахIенри. 2005 ибил дусла январьла 1-личибад бехIбихьили, Госдумали Бузерила кодекслизи кайкахъибти дарсдешлуми хIясибли, ил бархIи бузуси бархIили чебаахъиб. 2005 ибил дусла июльличиб Конституцияла БархIи хъумхIертести анцIбукьлумала лугIилизи каберхахъур.