ГIяхIси гIядат даимбирули

ГIяхIси гIядат даимбирули

Районна бекI Шамиль Дабишевли, Халкьла Собраниела депутат М. ХалалмяхIяммадовли, илкьяйдали районна бекIла заместительтани ва цархIилти хIянчизартани чучи челукьути масъултала хIекьлизиб адамти кьабулбирнила тяхIяр бузахъни даимбиубли саби. Ил гIяхIси гIядат саби. Илгъуна гьунибаънила гIергъи чи виалра разивиънила анцIбукьунира диубли дургар. Или биубхIели адамтала шайзибад хIякимтас баркалла хIебикIули хIебуар.

Гьалавванра Шамиль МяхIяммадович Дабишевли ва Мухтар ХалалмяхIяммадовли района шимазибадти адамти кьабулбариб. Адамти иша бакIилри чулати масъулти дуресцунра ахIи, жамигIятлати хIянчурбала хIекьлизирти масъулти ахъдуцесра. Илдани гьаладихьибти масъултала ургар лерри: хутIла шала гьаман билшахъниличила, спортла залланазир диэс гIягIнити ваяхI агниличила, биштIатас футболли биркьахъес мераначила, гьундури къулайдарес, шинна шайчибси аги гьамадбиахъес гIягIнили биъниличила ва цархIилти масъулти.

Иша вакIибси гьарилличил ихтилат барили, чучи челукьути масъулти секьяйдали арзес вирарал буриб. ИмцIатигъунти масъулти мерличирал арзиб. Шимала администрациябала бурги дугьабизурти масъулти ахIерзили кахIелахъес багьандан районна администрацияли чузибад лябкьуси биру или буриб. Адамтала цацадехI зугIялаби илди арзести министерствобази ва ведомствобази дархьиб.

Дебали мягIничебси баркьуди саби чучи челукьути масъултала хIекьлизиб хIякимтачи дугьабизурти адамтази илди арзниличила яра арзес имканхIебикIниличила балахъни. ГIяхIцад масъулти районна бекIли сунела хIерудилиу касили сари.

Сегъунти биалра зугIлуми чедуркъубти адамтачирад хIякимтала кумекличил илди чердикнила анцIбукь адамтас халаси разидешли бетарар, илхIели иру кумек барибтас баркалла.

ВегIла адамтас кумекчибили биъни хIякимтала бархьаначиси чеблара саби.