БучIантас дигуси учительница
ГIямарова Хадижат Халидовна Лавашала кIиибил номерла урга даражала школала бегIлара гIяхIти учительтазирад ца сари. Илала 45 дусла педагогикала стаж леб. Аммаки бузерила стаж багьандан ахIен ил бучIантас дигуси. Илини дурхIнас дигесли дарс кабирхьес бала, илдачи вявхIерикIар, хIейгеси гъай хIебуру, илди гьимхIебуркIахъу. Ил багьандан сари дурхIнас илала дурсри дигахъути. Гьай-гьайра, 45 дус ца хIянчилар рузухIели, илини сунела санигIят ункъли балули сари. Илала гIяхIдешли илис сунела багьудлуми бучIантази дедес гьамадли саби. Ил саби педагогла хIянчилизиб бегIлара дебали кьиматлабирусира.
ХIянчила опыт дусличи- дус ванбируси саби. Ил сархес багьандан Хадижатлисра дахъал къайгъни, къиян кабихьес чебуркъуб. Дагъиста Пачалихъла Университетла химияла- биологияла факультет таманбарили гIергъи, ил санигIят хIясибли Кьакьамахьила таманни ахIенси урга даражала школализир рузес рехIрихьиб. Шел дус илаб ламусличил хIянчи бариб. Сунечила гIяхIти пикруми акIахъуб. Бузерила шайчир гIяхIти къайгъначил декIаррулхъухIели, ил рузахъес районна багьудила отделлизи шурратур. Илар методкабинетлизир рузи. Илар школабазиб багьуди-бяркъ кайсахънила шайчиб дурабуркIуси хIянчила гьаркьяти, сагати тяхIурти дузесиънила ва методический хIянчила цархIилти кьялуби гьаладяхI ардукьахънила шайчиб белгиси хIянчи бариб. Илар рузуси заманара Хадижат гапла бузериличил декIаррухъун. Итди дусмазив райОНОлис бекIдеш дируси У. Каймаразовлизирадра Хадижатличила дахъал гапла гъай дакьес вири.
1990-ибил дуслизир Хадижат рузес Лавашала кIиибил номерла урга даражала школализи ракIиб. ИтхIейчирад къябхIерердили ил школализир биологияла дурсри кадирхьули рузули сари. Сунела дурсрачи дурхIназир диги акIахъубхIели, илис бучIантази гIяхIти багьудлуми кайсахъули рузес имканбикIули саби. Дурсри кадирхьухIели илини чебаъла ваяхI дягIули пайдаладиру, цархIилти дарсличи диги акIахъес сабабдирути тяхIурти дузахъу. ХIянчила халаси стаж лебли биалра, Хадижат сунела багьудлуми гьатIира чедицIахъести тяхIуртахIир умцIар, багьудлумала даража гьар даим чеахъбикIахъес къайгъназир рирар.
Опытчерси учительница сарлин Хадижат жагьилтала насихIятчира сари. Илини сагали бузерилизи ахъибти учительтас дахъал багалати насихIятуни дуру, гIеббуру, сунела опыт сахаватли илдас буртIу. Иличил ихтилатвикIес дебали иштяхIли бирар, — бурулри жагьил учительтани.
Дигалли адамдешла, дигалли педагогикала санигIятла устадешла шайчир Хадижат цархIилтас гIибрат сари. Барх бузутала ва школала гьуни чебиахъути хIянчизартала ургаб илала халаси хIурмат леб.
ГIяхIси бузериличирли декIаррулхъни багьандан Хадижат Халидовна чуйнара школалацун ахIенну, райОНОла, райадминистрацияла ва хIятта багьудила министерстволара балли шабагъатуначи лайикьрикиб.
Бузерила лерилра чедибдешуни Хадижатли сунела халаси хъалибарг абикьес кадирхьути къияндешуначи хIерхIеили сархибти сари. Ил багьанданра илала хIянчилис халаси кьимат хIебедес хIейрар.
Хадижатгъунти учительти бахъал-бахъал биалри, дурхIнала белчIудиличи дигира имцIали бирусири.
ГI. ГIялиев
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
