Шинна кьакьадеш диргалабулхъули

Шинна кьакьадеш диргалабулхъули

Шила хозяйствола хIянчизартас ишдус гьамадси убхIебухъун: апрель базлизиб бугIярдеш сабри, гьанна биалли шинна кьакьадеш диргалабулхъули саби. Или биалра, адамти чули бузахъуси санигIят заманала аги-кьяйдаличи хIерхIеили, бажардибарес хIяракатлизиб саби.

Дубурла районтала ванза бузахъанти хъумачи чейути шичил гIеббуцнила аги секьяйдал багьес багьандан Дагъиста шила хозяйствола ва берк-бержла министрла цаибил заместитель Шарип Шарипов Лавашала районнизира вакIиб.

Районна шила хозяйствола отделла начальник АсхIяб-гIяли ХIядисовличил варх ил Урмала, УхIлила, КьулецIмала шимази вякьун. Илабти адамти чула хъумачирад картошкала ва капустала халати сабухъуни дашахъниличибли машгьурти саби.

Бурес гIягIнибиркур, ишабтачи цугбуцести капуста дашахъанти улкализибра агара или. Республикализир дашахъути 700 азир тоннализирад 400 азир тонналичирра имцIали капуста ишар дашахъули сари. Илди Россияла Федерацияла чидилра мерличир дашахъутачир имцIали сари. Арбякьунси дуслизир дакIахъибти капуста, дебали дургIеси багьа диргалабухъи, дицес хIебиуб. АнцIбукь илкьяйда бетаур биалра, лебилра хъумачи дурабухъи ишдусра капуста дегIи сари, ишаб хIебелгIуси ванза чебаэсра хIейрар. Ишабти лебил ванза бузахъанти хIякимтачи гъамбиубли, дахъхIи заб хIерниличила, халаси буцIар-дешличила, бегIунси ванзализибад сабухъ секьяйда лябкьяхъусил гъайбикIулри.

Урмала мер-мусаличир ванзала удирти шин мурхьли-декIар ахIен. Бахъалгъунти ванза бузахъантани 25-40 метрла мурхьли къуюби дитIахъи, илад насосуначил хъумачи чейули сари. Илдани бурни хIясибли, ишдуслизир насосуни хIедузуси замана хIебиуб. Ил анцIбукьли биалли, хутIлис дахъал арц дедлугес чебуркъниличи бетиркахъули саби. Илала дурабад, шин лерил мераначир цагъуна мурхьдешлизир ахIен. Дахъал дегъубли сари. Илгъуна анцIбукьлизир, капуста калахъес багьандан цацабехIтани багьалис машинтачир хахъили шин чейули сари.