ХIялалси бузерилизир деркIибти дусми

Мубараквирулри!

ХIялалси бузерилизир деркIибти дусми

Бузерила ветеран МяхIяммадов МяхIяммадзагьир сентябрьла 15-личив 80 дус вирули сай. Наб илала гIямрула гьуни гьанбикахъес дигулра. Бахълис-декIар игъбар биубли хIебургар 80 дусла гIямру гIяйибтази хIейкили деркIес.

МяхIяммадзагьир Лавашала шилизив вегIла гьавси учитель ГIябдулаев МяхIяммадла хъалибарглизив акIубси сай. ЧебяхIси ВатIанна дявтала кьяркьти дусмазиб дудеш, узби ва рузи бебкIиб. Цайси МяхIяммадзагьир нешли айкьур.

Школализив учIухIели ил гIяхIти бухъя-зегъаличил, учIнила шайчибси бажардиличил декIарулхъусири. Пионервожатыйли, классла старостани, бучIантала комитетла членни викIибсири, комсомолла къяянази уцибсири, школала гIямрулизир жигарла бутIакьяндеш дирусири.

1958-ибил дуслизиб илини Лавашала урга даражала школа медальличил таманбариб.

ВиштIахIелла гIямрула хьул бетерхахъес дигули, Лавашала дявила комиссариатли гьалаихьни хIясибли, дявиласи авиацияла училищелизи керхурли урцнила санигIят касес кьасбариб. Аммаки, сунезиб бруцеллезный изала белгибарни багьандан, чаркарибсири.

Заман-замана чебулхъуси ил изай инжитвирусири. Амма, узес-укес гIягIнилри. 1958-ибил дусла ноябрьличив ил Лавашала судла секретарьли узес кайиб. 1961-ибил дуслизив коммунист партияла къяянази уциб. ЧебяхIси даражала багьуди касес халаси гъираличил Саратов шагьарла шила хозяйствола институтла чебяхIси категорияла бухгалтерти-экономистуни хIядурбируси отделениелизи учIес керхурсири. Ишав ил левгIевал гIяхIил учIусири ва чеимцIаси стипендияличил гIевуцибсири.

Партияла Лавашала райкомли 1964-ибил дуслизиб МяхIяммадзагьирлизи маялигIятбариб заочно учIес шурухахъес ва райкомла аппаратлизи хIянчилизи кайахъес. Гьаланачи ил райкомла инструкторли узусири, 1965-ибил дуслизив комсомолла райкомла отделла заведующийли шуратурсири.

1965-ибил дусла ноябрьличив ил Наскентла шила Калининна уличилси колхозла бекI бухгалтерли узахъес арукибсири. 1966-ибил дусла сентябрьличив, чебяхIси даражала бухгалтер-экономист сайлин, Дагъистайзиб гьаларти къяяназибси «Цудахарский» бикIуси колхозла экономистли арукиб. Илаб баркаллаличил хIянчира барили, МяхIяммадзагьир Лаваша чарухъун ва «Колхозла хIеб» газетала жавабла секретарьли узесвяхIиб. Ца дус ишаб хIянчи барили гIергъи, шила хозяйствола министерствола колхозунас-совхозунас ревизияби дируси управлениела контролер-ревизорла хIянчиличи шурухъун. Амма, мурталра командировкабачив ветаруси ил хIянчи хъалибарг лебси адамличи балхIебикни чебаили бархьбатур ва сунела шилизи чарухъун.

1971-ибил дуслизив районна финотделла бекI бухгалтерла хIянчиличи живариб. Ишаб илини 15 дус хIянчи бариб.

МяхIяммадзагьир гьарил хIянчилизив бажардииркуси коммунист партияла член сайни багьандан иличи жамигIятла хIянчира чедилгьутири. Сай узути мераначив ил комсомолла, партияла организациябала секретарьли яра заместительли виркIусири, политбелчIудила халал варили узахъусири. Илбагьандан партияла райкомли МяхIяммадзагьир сунела кадрабала резервлизи касибсири.

1977-1978-ибти дусмазив ил райисполкомла культурала отделла заведующийли узахъес вархьиб. Партияла ил хъарбаркьра сунечи гIяйибхIебаресли барибсири.

1978-1980-ибти дусмазив Лавашала халкьлис бекIахъудилашал къуллукъбируси комбинатла директорла заместительли узули калун. Ишавра илини сай бажардичевси хIянчизар сайлин чеахъиб. Ил багьандан чарарили райфинотделла бюджетный инспекцияла начальникли арукиб.

1986-ибил дуслизив партияла райкомли ил районна агропромышленное объединениела (РАПО) бекI экономистли узахъес вархьиб. Ишав узуси ца дусла бухIнаб илини районна колхозунала-совхозунала бузерила асарчебдешла анализ бариб, илди гьаладяхI дашес хIедирнила сабабти дакIудариб.

ХIянчиличи мурталра чекайзурси МяхIяммадзагьирла арадеш нукьсанбикни чебиули, илини циила гьамадси хIянчиличи шурухъес пикрибарили, шила хозяйствола хIянчизартала профсоюзла райкомла инструктор-ревизорли узес кайиб. Дагъиста профсоюзла обкомли МяхIяммадзагьирла хIянчи гIяхIил кьиматлабариб. Иличи районнацунра ахIи, Дагъиста цархIилти районтала профсоюзла комитетунала финансунала-хозяйствола хIянчира ахтардибирахъес урхьусири.

1991-ибил дусла майличиб Россияла Пенсионный фондла Дагъистайзибси управлениели районтази Пенсионный фондла уполномоченныйти кабатес конкурс багьахъурхIели ил хIянчиличи МяхIяммадзагьир лайикьсили чеиб. Пенсионный фондла районнизибси отделениелизив старший инспекторли узес вехIихьибсири ва 2006-ибил дусла март баз кеберхайчи ишав декIар-декIарти къуллукъуначив узули калун. ГIяхIси хIянчи барни багьандан Пенсионный фондла Дагъистайзибси управлениели мубуракла кагъарра белкIи, арцла шабагъатра бедили, МяхIяммадзагьир бамсриахъахъес гьунивватурсири. Илала гIергъира акьули кахIели УллугIяяла шила администрацияла бухгалтерли, гьундурала управлениела жавабла хIянчизарли узули калун.

МяхIяммадзагьир чинав узаллира иличи гIяйиб барибси анцIбукь хIебиуб.

Сай 50 дус виубхIели илис «Бузерила ветеран» медаль бедибсири. ИтхIели илала хIянчила стаж 33 дусличи абикилри.

60 дусла гIямруличи айкибхIели Дагъистан Республикала Правительстволи илис «Республикала урибси экономист» у бедибсири.

МяхIяммадзагьир уржибси хъалибаргла бекI сай. Илинира сунела хъа регI Айзанатлира 4 рурсира 1 уршира абикьур. Гьанна хIябал рурси Лавашала кIиибил номерла школала чебяхIси категорияла учительницабили бузули саби. Урши МяхIяммадхай армиялизиб кIел дус къуллукъбариб, илала гIергъи электрикла, шоферла, автослесарьла санигIят касиб. Ленинкентлизибси милицияла школа таманбариб.

МяхIяммадзагьир дурхIнала биштIатас дигахъу, илис кумекличи музабулхъан, шадиб башар.

80 дусла гIямруличи айкили, кьаркьайзибси цIакь камбиубли, хIулбала шала нукьсанбикили биалра, МяхIяммадзагьир гIямрулизив сай бурсивиубти бузериличи дигичебдешла тяхIяр-кьяйда хъумартурли, кайили уэс вирули ахIен. Дугелла замана школализиб къараулла хIянчи чесили сай. Ил хIянчи бируси адамлис, гьай-гьайра, хIерелла замана гьанкI ихъес, паргъатли кайэс гIягIнибиркур. МяхIяммадзагьир биалли сунечи чи укьяллира, хIебла замана хъу икъули, велгIули ва цархIилти хIянчилизив чеэс вирар. ДегIунти культурабас чебетаибси къуллукъ биру. Илала гIяхIдешли хъулизиб дегIнубас диргаласи арцIи-кьар чебаэс хIейрар. Сабухъ бучес замана сабаибхIелира имцIатигъунти хIянчи сунени дирули сай. Ил чинав саял гIягIнидеш лебли зянкъдяхъяллира, итил-ишил хIянчилизив сайра или ахIи, акьули кайилра или ибси жаваб чилилра мажагIят бакьес.

Дахъал дусми гьалаб сунес хъали-цIа дарахъес мер чебаахъибхIели, ил шурмани буцибси, диркьбикахъес, манпагIятласили бетаахъес багьандан дахъал хIянчи гIягIниси мер сабри. Жагьси замана илди секIал дарес дахъал цIакьани ва арц харждарили пайдаласили бетаахъур. Гьанна илар декIар-декIарти духълумала гIяхIти сабухъуни дашахъули саби.

МяхIяммадзагьирли сунес бедибси хъуличир дарибти хIянчиличилара дахъал дурес вири. Цайси адам виъни багьандан иличи хъалибарг абикьнила шайчир дахъал хIянчи дарес чебуркъуб, чедир нушани дурибти хIукуматла хIянчурбира ламусличил хъарарахъули.

Гьанна 80 дусла гIямруличи айкибси, илди манпагIятличил деркIибси МяхIяммадзагьир хIу гIурра Аллагьли вецIани дусмазив ара-сагъли калахъаби.

Илди дусмачи айкниличил мубараквирулри ва 100 дус виайчи Аллагьли арали вихIяби.

Н. ГIялиев