М.М.МяхIяммадов Россияла Федерацияла бузерила Игит

М.М.МяхIяммадов Россияла Федерацияла бузерила Игит

Россияла Федерацияла Игит бикIуси у Россияла Президент В.В. Путинна 2013-ибил дусла мартла 29-личибадси №294 Указ хIясибли кабизахъурси саби.

Россияла Федерацияла бузерила Игит пачалихъла ва халкьла гьаларти бузерилати къуллукъунас бегIлара чебяхIси кьимат, Россияла Федерацияла пачалихъласи шабагъат саби. Илгъуна у бедлугуси саби Россияла Федерацияла гражданиннис, Ро-ссиялис гIяхIдешлис ил вавалибирхъниличи дяхIчиаибти пачалихълати, жамигIятлати ва хозяйственныйти къуллукъуназир черяхIти сархибдешуни диахънила шайчиб пачалихъла ва халкьла гьаларти лергIерал халати бузерилати къуллукъуни багьандан.

Бузерила Игитла у-личи лайикьикибсилис лугуси саби «Россияла Федерацияла бузерила Игит» мургьила медаль ва Россияла Федерацияла бузерила Игит у беднила хIекьлизибси Грамота.

Владимир Путинни 2019-ибил дусла октябрьла 21-личиб кьулбасбарибси №506 Указ хIясибли пачалихъла ва халкьла гьаларти лергIерал халати къуллукъуни хIясибли ДР-ла Пачалихъла Советла ХIурматла Председатель МяхIяммадгIяли МяхIяммадовлис Россияла Федерацияла бузерила Игитла у бедили саби.

Иличил бархбасахъи, районна Администрацияла бекI Ш. Дабишевли районна халкьла шайзивад ил мубараквирули белкIун: «Россияла Федерацияла бузерила Игитла у гибниличил ХIу уркIи-уркIилавад мубараквирулри. Халкьанала гьалмагъдеш дебадиахънилизи, нушала мерличиб балбикибдеш гIеббуцнилизи, Россияла Федерацияла бухIнаб республикала цадеш ва цабайдеш калахънилизи ХIуни кабихьибси пай халаси саби. Бируси секIайзиб ХIела халаси гъирачебдешли, хIянчилизибси халаси бажардичебдешли, хIянчиласи бурсидешли ва хIял-тIабигIятли ХIу халаси политикаласи хIянчизарли, цехIнабли Россияла даражала политикли ветаахъурри, Дагъистайзибцунра ахIи илала дурарти дахъал мераначирра ХIела кьадри ва хIурмат дебали ахъдиуб.

ХIу декIар-декIарти да-хъал хIянчурбачив узули уири. Лайикьти сари ХIела халаси бузерилис гибти дахъал шабагъатунира.

«ВатIанна гьаларти къуллукъуни багьандан» орденничил шабагъатлабарибти 10 адамла ургав ХIура сайри. Россияла миллатунала цадеш дебабиахънилизи кабихьибси мекелли халаси пай багьандан Россияла Федерацияла сагаси тарихлизив Россияла Президентла премияличи лайикьвикибси вегI-гьалавси ХIу сайри.

Лавашала районна лебил халкьла шайзивад ХIу пачалихъла халаси у-личи лайикьвикни багьандан уркIи-уркIилавад мубараквирулри. Россияла ва Дагъиста гIяхIдешлис гьаннала гIергъира ХIела бузерилизир сархибдешуни диубли дигулра. ХIед духъянти гIямру, арадеш, талихI диаб, даршудеш ва авадандеш диаб лебтасалра».